عفوا...!! بس هادي واقعنا وصفات نسبة كبيرة منا

ان دخول التقنية الحديثة و الانترنت و وسائل الاتصال إلى بلادنا عمل تغير كبير في مفاهيمنا و عاداتنا و حتى أخلاقنا .......


فويحدنا وقت بيروح ليشتري موبايل بيدور عن آخر طراز وأحدث المواصفات ، و بيطلب ميزات كاملة وخارقة و الجي بي اس( خدمة تحديد المواقع عبر الأقمار الصناعية ) و الواي فاي وووووو وبيدفع مبلغا مانو قليل منشان يحصل على هيك موبايل..!!

علماً أن معظم هذه الميزات مابتشتغل عنا... و( كلها بكفة و الجي بي إس بكفة لأنو صاحبنا من البيت للشغل او المدرسة او الجامعة او.....و منها للبيت و إذا راح بيروح عالكافتيريا يعني كتير لازمو الجي بي إس منشان يحدد موقعو بالكافتيريا على أي طاولة )

بتشوفو على طول ماسك موبايلو و مستعد للضغط على زر الكاميرا و كأنه يترقب حدث مهم أو تسجيل هدف في نهائي كأس العالم، و ما إن يلتقط صاحبنا صورة ما حتى ينشرها على الانترنت مع عنوان طنان يشد القارئ ( و كأنو صاحبنا مصور الوجه الآخر للمريخ أو المشتري من شي مركبة فضائية و لسا إذا كان مقطع فيديو.... فيا ويلنا انترنت و بلوتوث و ايميلات)


بتشوفو شايل شنته أنيقة فيها اللابتوب و غالباً ما يكون بمواصفات عالية واحترافية ( رام مدري كم جيجا و هارد مدري كم مية جيجا و معالج مدري كم كور ) و إذا سألته لاشو بتستخدم الكومبيوتر بقلك أنه بيفتح إيميله و بيستخدمه للشات ( و بيفتح كم موقع تانيين و شوية ألعاب )

وبس يفتح الانترنت و يمر على شيء موضوع ما في أحد المنتديات أو المواقع بتشوفو عم يرد على الموضوع و يمطر صاحب الموضوع بكلمات ( مشكوووووووووور و يسلمووووووووو و جاري التحميل و غيرها ) علماً أن صاحبنا لم يحمل الموضوع وحتى لم يجرب الرابط و قد يحوي الموضوع فيروسات أو غيرها و قد يكون الرابط لا يعمل من الأصل و غالباً ما يقوم صاحبنا بعمل نسخ و لصق للموضوع في منتديات أخرى وإذا كان أمين جداً قد يضيف كلمة منقول

خلينا بالانترنت فما إن يصل لصاحبنا إيميل حتى يقوم بإرساله لمعظم قائمة الأصدقاء اللي عنده( و الله وحده العالم شو في بالايميل يمكن يكون شي كذبة أو تأفيلة حشاش أو صورة مفبركة بالفوتوشوب لشي معجزة أو فضيحة...) وإذا كان الإيميل من فئة إنشر ولك الأجر ...!بتشوفو عم يزيد عدد المستلمين ليحصل على الخمسين مليون حسنة التي وعده بها صاحب الايميل الأول ( و يمكن صاحبنا ما بيعرف كيف يصلي )

كل ماصارتلو فرصة بتشوفو عم يحكي عن التطور في أوربا و أمريكا و.....وبيحكيلك عن تطور البنوك و بطاقات الائتمان و خدمات شركات الطيران الأوربية و الحجز فيها عبر الانترنت و التسوق على الانترنت و الخدمات الحكومية الالكترونية و لا يعجبه التخلف في بلادنا و كأنو صاحبنا بيقضي عطلة نهاية الأسبوع بإحدى الدول الأوربية و الأسبوع الثاني بدولة أخرى ( و يمكن يكون صاحبنا أبعد نقطة سافر لها هي دير الزور لما نجح بالبكالوريا أول مرة و ما قبلوه غير بجامعة الفرات فسجل فيها و عاد بكالوريا و درس بعدين ببلده)

طولت عليكون سامحونا ,بس اللي بدي قولو :كل ويحد فينا بيحسن يطلع حواليه و حتى إلى نفسه ليرى مدى صحة تعامله مع التكنولوجيا الحديثة واعذروني لكلامي فهذا الواقع و هذه الصفات تنطبق على نسبة كبيرة منا......

وهادي مابيمنع من وجود أشخاص كتير بيناتنا بيعرفو كيفية الاستفادة المثلى من التقنية... و طوروا أنفسهم علمياً و عملياً و وسعوا أفق فكرهم و ثقافتهم عبرها.


مع خالص احترامي للجميع